«Քաղաքացիական պայմանագիր» կուսակցության վարչության անդամ և ՀՀ ԱԺ 6-րդ գումարման պատգամավոր Նիկոլ Փաշինյանը 2018 թվականի մարտի 31-ին ընդդեմ Սերժ Սարգսյանի հետագա իշխանավարմանը սկսեց բողոքի քայլերթը, որը մեկնարկեց Գյումրի քաղաքից՝ անցնելով Վանաձոր, Դիլիջան, Հրազդան, Աբովյան քաղաքներով և ապրիլի 13-ի հասավ մայրաքաղաք Երևանի Ազատության հրապարակ, որին հաջորդեցին շուրջօրյա հանրահավաքները:
2018 թվականի ապրիլի 13-ին՝ մոտավորապես ժամը 13:30-ի սահմաններում Գյումրիից դեպի Երևան քայլերթ կատարող «Իմ քայլը» նախաձեռնության անդամներին Երևանի Ավան թաղամասի մատույցներում դիմավորեցին «Մերժիր Սերժին» նախաձեռնության անդամները: Երկու նախաձեռնությունների տասնյակ անդամներ քայլերթով շարժվեցին դեպի Ազատության հրապարակ՝ ճանապարհին իրենց բողոքը հայտնելով Երևանի պետական համալսարանի ռեկտոր Արամ Սիմոնյանի և բուհի ղեկավարության կողմից ուսանողների կողմից հնչեցրած դասադուլի կոչեր անելուն խոչընդոտելու դեմ:
Սերժ Սարգսյանի վարչապետության դեմ պայքարող քաղաքացիներն ու ուժերը նախօրոք նախատեսել էին, որ ապրիլի 14-ին պետք է շրջափակեն Հայաստանի հանրապետական կուսակցության կենտրոնական գրասենյակի շենքը, որպեսզի թույլ չտան կուսակցության կողմից Սերժ Սարգսյանի վարչապետի թեկնածության առաջադրումը: Համաձայն բողոքի գործողություններ իրականացնող ուժերի՝ Հանրապետական կուսակցության ներկայացուցիչները, վախենալով ժողովրդի կողմից սպասվելիք անհնազանդության գործողություններից, կուսակցության գերագույն մարմնի նիստը տեղափոխել են Ծաղկաձոր քաղաք: Իմանալով, որ նիստի անցկացման վայրը փոխվել է՝ Նիկոլ Փաշինյանը կոչ արեց ավտոմեքենաներով մեկնել Ծաղկաձոր և շրջափակման մեջ վերցնել իշխող կուսակցության անդամներին:
Ապրիլի 15-ին երեկոյան 18։00-ի հանրահավաքի ժամանակ Նիկոլ Փաշինյանը ներկայացրեց քաղաքացիական անհնազանդության գործողությունների վաղվա պլանը։ Նա քաղաքացիներին կոչ արեց գործողությունները սկսել 08:15-ից։ Անհնազանդության քայլերից պետք է լինեն Երևանի կամուրջների արգելափակումը, տրանսպորտային ցանցի խափանումը, դասադուլները, գործադուլները:
ժամը 11:45-ին ցուցարարների և ոստիկանության միջև բախումներ են սկսվել Հերացի-Կորյուն խաչմերուկից փողոցը փակած ցուցարարներին հեռացնելուց հետո ոստիկանական ուժերը բացեցին փողոցն ու պատ կազմեցին: Մի քանի րոպե հետո հազարավոր ցուցարարներ Նիկոլ Փաշինյանի գլխպավորությամբ հասան բախման վայր և ճեղքեցին ոստիկանական պատնեշը, որից հետո Չարենցի փողոցից մեծաքանակ ոստիկանական ուժեր վազքով մոտեցան ցուցարարներին:
Քաղաքացիական անհնազանդության և փողոցներ փակելու գործողություններն ինչպես պլանավորված էին, սկսեցին առավոտյան 08։15-ին։ Ցուցարարները կես ժամվա ընթացքում փակեցին Բաղրամյան պողոտան, Աբովյան, Սարյան, Կորյուն, Ամիրյան փողոցները, Արշակունյաց և Ազատության պողոտաները։ Ակտիվիստները որոշ ժամանակ փակ պահեցին մետրոյի Երիտասարդական կայարանը։ Փակված փողոցներում ակտիվիստները որպես բարիկադ օգտագործում են նստարաններ և աղբամաններ։
Համաձայն տեղեկատվության՝ ՀՀ ոստիկանությունը Պռոշյան փողոցում տեղակայել է զրահամեքենաներ, որոնց վրա տեղադրված են գնդացիրներ: Մի քանի ոստիկանական զրահապատ մեքենաներ են կանգնած նաև Պռոշյան փողոցում գտնվող Սերժ Սարգսյանի առանձնատան դիմաց: Տեղեկություններ կան այն մասին, որ ՀՀ ոստիկանությունը տանկեր է տեղակայել Մարշալ Բաղրամյան պողոտայի միջնամասում:
Ժամը 09:20-ին Ֆրանսիայի հրապարակից սկսել է բազմամարդ բողոքի երթ, որն անցնելով տարբեր փողոցներով, կոչ է արել քաղաքացիներին միանալ իրենց: Ժամը 10:00-ի դրությամբ երթը վերածվել է բազմահազարանոց բողոքի գործողությունների: Ժամը 10:50-ին Նիկոլ Փաշինյանի առաջնորդությամբ բազմահազարանոց բողոքի երթը Հանրապետության հրապարակում կաթվածահար է արել երթևեկությունը:
Ժամը 11:00-ին ՀՀ ոստիկանությունը նոր ուժեր է կենտրոնացնում վարչապետի նստավայրի մոտ, որոնք զինված են մահակներով, սաղավարտներով և հակագազերով՝ բերման ենթարկելով հրապարակում գտնվող բազմաթիվ ցուցարարների: ժամը 11:20-ից ոստիկանությունը սկսեց բերման ենթարկել Մաշտոցի պողոտայում հավաքված ցուցարարներին:
2018 թվականի ապրիլին Հայաստանում տեղի ունեցող բողոքի զանգվածային գործողություններին է անդրադարձել Ամերիկայի Միացյալ Նահանգների Պետական քարտուղարությունը: Human Rights Watch մարդու իրավունքների միջազգային կազմակերպությունն անդրադարձել է 2018 թվականի ապրիլին Հայաստանում տեղի ունեցող բողոքի զանգվածային գործողություններին
Վաղ առավոտից ՀՀ ոստիկանությունը վահաններով և մահակներով զինված մեծաքանակ ոստիկանական ուժեր է կենտրոնացրել Հանրապետության հրապարակում, տեղակայված են նաև դիմակավորված ոստիկանական ստորաբաժանումներ: Քաղաքացիական համազգեստով ոստիկանների կողմից ծեծի է ենթարկվել «Իրազեկ քաղաքացիների միավորում» կազմակերպության լրագրող Տիրայր Մուրադյանին, ով տեղափոխվել է հիվանդանոց:
Ժամը 10:20-ին Հանրապետության հրապարակից մեկնարկում է ցուցարարների երթը Նիկոլ Փաշինյանի առաջնորդությամբ: Ցուցարարները քայլերթով շարժվեցին Խանջյան փողոցով:Ժամը 10:50-ին ցուցարարները մտան Արշակունյաց պողոտա: Նրանք վանկարկում են «Սերժին դեմ ե՞ս, սիգնալ տո՛ւր», «Միացում» կարգախոսներ:Ժամը 11:00-ին բազմահազարանոց ցուցարարները մտել են «Սուրմալու» տոնավաճառներ և կոչ արել աշխատակիցներին միանալ իրենց:
Ոստիկանությունը մայրաքաղաքի տարբեր հատվածներից սկսել է մասայաբար բերման ենթարկել քաղաքացիների, այդ թվում՝ շարժման համակարգողներին: Արաբկիր թաղամասի քաղաքացիների կողմից փակված Գյուլբենկյան փողոցում ժամը 09:17-ին ոստիկանությունը սկսել է բերման ենթարկել քաղաքացիներին և ուժի կիրառմամբ փողոցը բացելը: Ոստիկանների և քաղաքացիների միջև սկսվել է ընդհարում:
Ժամը 10:10-ին ցուցարարները Նիկոլ Փաշինյանի առաջնորդությամբ Գուլբենկյան փողոցից երթ սկսեցին: Հայաստանի Հանրապետական կուսակցության անդամ, ՀՀ Ազգային ժողովի պատգամավոր Կարինե Աճեմյանը լրագրողի հետ զրույցում հայտարարել է, բողոքող ցուցարարները դեռևս ամբողջ ազգը չեն ու ամոթ է այսպիսի գործողություններ կատարելը, քանի որ զբոսաշրջիկների մոտ Հայաստանը վատ տպավորություն կթողնի:
Ապրիլի 21-ին ժամը 22:00-ից համաձայն լրատվամիջոցների հրապարակումների՝ ՀՀ ոստիկանությունը բերման է ենթարկել Երևանից դեպի մարզեր շարժվող ավտոշարասյունների վարորդների ու քաղաքացիների: Մարզերի ճանապարհներին խաչմերուկներում ընդհարումներ են եղել ոստիկանության հետ: Ցուցարարների և լրագրողների նկատմամբ բռնություններ են կիրառվել Գյումրիում, Վանաձորում և մի շարք ավտոճանապարհներին:
Սերժ Սարգսյանի հայտարարությանը, որում կոչ է անում Նիկոլ Փաշինյանին նստել երկխոսության սեղանին, Նիկոլ Փաշինյանը լրագրողների միջոցով պատասխանել է, որ բանակցությունների միակ հարցը կարող է լինել Սերժ Սարգսյանի հեռացումն ու իշխանության առանց ցնցումների փոխանցումը:Ժամը 23:40-ին Նիկոլ Փաշինյանը շտապ հայտարարությամբ հանդես եկավ և հայտնեց, որ ապրիլի 22-ին Մարիոթ հյուրանոցում հանդիպելու է ՀՀ վարչապետ Սերժ Սարգսյանի հետ վերջինիս հրաժարականի մասին քննարկումներ իրականացնելու համար:
Հանդիպման ընթացքում Սերժ Սարգսյանը հայտարարում է, որ 7-8 տոկոս ձայն հավաքած կուսակցությունը իրավունք չունի խոսել ժողովրդի անունից և կոչ անում գալ իրավական դաշտ: Նիկոլ Փաշինյանը հայտարարում է, որ Սերժ Սարգսյանը չի տիրապետում երկրում տիրող իրավիճակին, իսկ նրա հետ իրենք կբանակցեն միայն իշխանությունը խաղաղ և անցնցում փոխանցելու շուրջ: Այնուհետև Սերժ Սարգսյանը հայտարարեց, որ նման ձևաչափով չի շարունակի հանդիպումը և որ իր դեմ պայքարողները դասեր չեն քաղել մարտի 1-ի իրադարձություններից:
Ժամը 11:47-ին Նիկոլ Փաշինյանը, պատգամավոր Արարատ Միրզոյանը, Սասուն Միքայելյանը ու բազմաթիվ ցուցարարներ բերման են ենթարկվում դիմակավորված ոստիկանական հատուկ ստորաբաժանման կողմից:Ցուցարարները Արցախի փողոցով սկսում են նահանջել: Ոստիկանությունը մեծ ուժերով հետապնդում է ցուցարարներին և բերման ենթարկում:
Ապրիլի 23-ի առավոտյան ժամը 8:15-ից Հայաստանի Հանրապետության ողջ տարածքով վերսկսվում է բողոքի գործողությունները: Գործողություններ են եղել՝ Մասիսում, Գորիսում, Գյումրիում, Վանաձորում, Էջմիածնում, Աշտարակում, Օձունում, Սևանում Գագարինում, Հրազդանում և բազում այլ քաղաքներում ու գյուղերում: Երթերով կենտրոն էին շարժվում նաև Երևան մայրաքաղաքի բոլոր համայնքների բնակիչները: Ժամը 11:45-ին Խանջյան փողոցի սկզբնամասում տասնյակ հազարավոր ցուցարարներին են միանում և նրանց երթն առաջնորդում Երևանում տեղակայված խաղաղապահ զորամասի տասնյակ զինծառայողներ: Ցուցարարները երգում են ռազմահայրենասիրական երգեր և վանկարկում «Միացե՛ք»: Ապրիլի 23-ին ժամը 16:15-ին ՀՀ վարչապետ Սերժ Սարգսյանը հրաժարական է տալիս:
